Hemodialysis

Ang tungkulin ng mga bato ay upang tanggalin ang mga dumi at labis na tubig mula sa katawan. Binabalanse din ng bato ang lebel ng mga mineral sa katawan na tinatawag na electrolytes. Mahalaga ang mga bato sa kalusugan ng katawan. Ang mga taong may malubhang sakit sa bato ay walang kakayanan na maisagawa ang mga tungkuling ito. Ito ay maaaring dahil sa pansamantala o permanenteng kondisyon sa bato. Ang hemodialysis ay isang paraan ng pagbibigay lunas na siyang pumapalit at gumagawa ng mga mahahalagang tungkulin ng bato hanggang sa gumaling ang sakit mo dito, o kumuha ng pamalit sa bato (kidney transplant). Kung ikaw ay may sakit sa bato na nasa huling yugto na (end stage renal disease) at hindi na maaaring salinan ng ibang bato, maaaring kailanganin mong mag-hemodialysis habambuhay. Ang peritoneal dialysis ay isa pang uri ng dialysis, ngunit hindi ito tatalakayin sa artikulong ito.

Ang hemodialysis ay nangangailangan ng daanan sa malakas ang daloy ng dugo. May 3 paraan upang gawin ito.

• Dialysis catheter. Ito ay isang plastik na tubo na inilalagay sa malaking ugat na daluyan ng dugo na karaniwang para sa pansamantalang daanan. Kung wala ng ibang opsyon, maaari itong permanenteng gamitin.

• AV fistula. Sa pamamagitan ng isang menor na operasyon, isang malaking ugat sa iyong braso ang direktang ikakabit sa isang bena. Ito ay lumilikha ng isang arteriovenous fistula o AV fistula. Ang presyur ng dumadaloy na dugo mula sa malaking ugat ay dahan-dahang nagpapalaki sa nakakabit na bena. Maaaring abutin ng 4 hanggang 6 na linggo para mapalaki ng husto ang fistula at maging handa ito para sa dialysis. Ang AV fistula ang mainam na daanan. Ito ay dahil sa karaniwang mas kaunti ang problema at side effects nito. Mas tumatagal din ito kumpara sa ibang mga opsyon.

• AV graft. Ito ay isang artipisyal na itinatanim (implant) upang pagsamahin ang isang malaking ugat at bena sa mga taong may maliliit na bena. Maaari din itong gamitin kapag hindi gumana ang AV fistula. Maaari na itong magamit sa dialysis makaraan ang ilang linggo pagkatapos ng operasyon.

Isang tubong pangkonekta ang naghahatid ng dugo mula sa punto ng daanan sa katawan patungo sa makinang pang-dialysis, kung saan sinasala at pinoproseso ng mga espesyal na pansala na tinatawag na dialyzers ang dugo. Pagkatapos ay ibinabalik ang dugo sa katawan gamit ang nakahiwalay na tubo at karayom. Tumatagal ito ng 3 hanggang 4 na oras at karaniwang ginagawa 3 beses sa isang linggo. Ang pagda-dialysis sa tahanan ay isa tring opsyon sa ilang pasyente.

Ang hemodialysis ay nakapagliligtas ng buhay para sa mga taong pumalya na ang bato, ngunit may mga posibleng sid effect ito. Kabilang dito ang mga impeksiyon, mababang presyon ng dugo, electrolyte imbalance, anemya, at sakit sa puso.